චූදිතයකුට එරෙහිව සාක්ෂි තැන්පත් කර තැබීම - කෙටි සටහන්.

චූදිතයකුට එරෙහිව සාක්ෂි තැන්පත් කර තැබීම - කෙටි සටහන්.

 

අපරාධ නඩු විධාන නීතියෙන් ප්‍රතිපාදන සලසා ඇති නමුත් එතරම් භාවිතා නොවන තවත් ප්‍රතිපාදනයක් සම්බන්ධයෙන් මෙම කෙටි සටහන තබමි. චූදිතයකු නොමැතිව නීතීඥවරයකු පෙනී සිටින අවස්ථාවේදී නඩු කටයුතු පැවැත්වීම ගැන ඉහතින් සටහන් තබා ඇත. එකී තත්ත්වය සඳහා නඩු විභාගයක් ආරම්භ කිරීමේ මුල් අදියර සම්පූර්ණ කිරීමේ අවශ්‍යතාවය එහිදී සාකච්ඡා කොට තිබේ. එවැනි අවශ්‍යතා සපුරා නැති විටකදී සිදු කළ හැකි කාර්යයන් සම්බන්ධයෙන් ද ලංකාවේ අපරාධ නඩු විධාන නීතිය නිහඬ නැත. ඒ අනුව අපරාධ නඩු විධාන සංග්‍රහයේදී චූදිතයා නොමැතිව නඩු ඇසීමක් නොවන නමුත් චූදිතයාට එරෙහිව සාක්ෂි තැන්පත් කර තබන අවස්ථාවක් වෙයි. ඒ පිළිබඳව මෙහිදී සලකා බලමු.

අපරාධ නඩු විධාන සංග්‍රහ පනතේ 416 වගන්තිය අනුව,

(අ)       චූදිතයා පැනගොස් සැඟ වී සිටින බව හා ඔහු සිරභාරයට ගැනීමේ නුදුරු බලාපොරොත්තුවක් නොමැති බව ඔප්පු කළහොත්,

(ආ)      පැමිණිලි කරනු ලැබූ වරද සම්බන්ධයෙන් චූදිතයාට විරුද්ධව නඩු විභාග කිරීමට හෝ චූදිතයාගේ නඩු විභාගය ඉහල අධිකරණයට තැබීමට බලය ඇති අධිකරණය විසින් ඔහු නොමැතිව,

(ඇ)      චෝදක පක්ෂය වෙනුවෙන් ඉදිරිපත් කොට ඇති සාක්ෂිකරුවන් වෙතොත් ඔවුන් විභාග කොට ඔවුන්ගේ දිව්රුම් සාක්ෂි සටහන් කර ගත හැකි ය.

ඒ අනුව මේ යටතේ කටයුතු කිරීමට පැමිණිල්ල විසින් ප්‍රථමයෙන් ම චූදිතයා පැන ගොස් සැඟ වී සිටින බව හා නුදුරේ දී ඔහු සිරභාරයට ගැනීමේ බලාපොරොත්තුවක් නොමැති බව ඔප්පු කළ යුතු ය. මෙහි දැක්වන පැන ගොස් සැඟවීම සිටීම 192 වගන්තියේ දැක්වෙන කරුණු හා සමාන නොවේ. එනිසා පැන ගොස් සැඟ වී සිටින බව පැමිණිල්ලෙන් ඔප්පු කළ යුතු වේ. වරෙන්තුව ක්‍රියාත්මක කිරීම පිළිබඳව වන සටහන් ඉදිරිපත් කිරීම ආදිය මෙහිදී වැදගත් වේ. එය සාධාරණ සැකයෙන් ඔබ්බට ඔප්පු කිරීම අවශ්‍ය නොවේ. ශක්‍යතා වැඩි බර මත ඔප්පු කිරීම ප්‍රමාණවත් ය. එසේ ඔප්පු කිරීමෙන් පසුව ලබා දෙන සාක්ෂි වාර්තා කරනු ලැබිය හැක.

මෙසේ වාර්තා කරනු ලබන සාක්ෂි,

(අ)       දිව්රුම් සාක්ෂි දුන් සිද්ධි ප්‍රකාශක මියගොස් සිටිතහොත් හෝ සාක්ෂි දීමට නොහැකි තත්ත්වයක සිටිතහොත්,

(ආ)      නඩුවේ අවස්ථානුගත කරුණු අනුව අයුක්ති සහගත ප්‍රමාදයක්, වියදමක් හෝ අපහසුතාවක් නොමැතිව සාක්ෂිකරුගේ පැමිණ සිටීම සලසා ගත නොහැකි වුවහොත්,

ඒ චූදිතයා සිරභාරයට ගනු ලැබූ විට ඔහුට චෝදනා නගා  ඇති වරද සඳහා වන පරීක්ෂණයකදී හෝ විභාගයේදී ඔහුට විරුද්ධව සාක්ෂියේ දී ඉදිරිපත් කරනු ලැබිය හැකිය.

එවිට එම සාක්ෂිකරුගෙන් හරස් ප්‍රශ්න අසනු නොලැබුවද එම සාක්ෂිය චූදිතට එරෙහිව ආවේශ්‍ය කළ හැක.

මෙකී ප්‍රතිපාදනය චූදිතයකු නොමැතිව නඩු කල් ගත වන විට ඉන් අගතියට පත්වන වින්දිතයන්ට එක්තරා ආකාරයක ප්‍රතිලාභයකි. එසේම චූදිත ඉදිරිපිට දී ඔහුට එරෙහිව ඇති සාක්ෂි කැඳවනු ලැබිය යුතු බවට වන රීතියට ව්‍යතිරේකයකි*.

* බලන්න අපරාධ නඩු විධාන සංග්‍රහ පනතේ 272 වගන්තිය.