2023 අංක 10 දරන පනතේ වැරදි වලට ඇප ලබා දීම

2023 අංක 10 දරන පනතේ වැරදි වලට ඇප ලබා දීම

2023 අංක 10 දරන අපරාධයක වින්දිතයන් සහා සාක්ෂිකරුවන් හට සහාය දීමේ සහා ආරක්ෂා කිරීමේ පනතේ 14-23 දක්වා වූ වගන්ති වලින් පනත යටතේ වන වැරදි කීපයක්ම දක්වා තිබේ. එම වැරදි පනතේ iii කොටසේ ඇතුලත්ව ඇත. මේ වැරදි විවිධ ස්වභාවයේ වැරදි වේ. 

පනතේ 24 (1) වගන්තියට අනුව එම වැරදි සංඥෙය වැරදි වන අතර 1997 අංක 30 දරන ඇප පනතේ අර්ථානුකූලව ඇප දිය හැකි වැරදි වේ. ඒ අනුව ඇප පනතේ විධාන මෙම වැරදි සම්බන්ධයෙන් ඇප නියම කිරීමේදී අදාල කරගැනීමට හැකියාව ලැබේ. ඒ අනුව ඇප පනත අනුව නියම කළ හැකි ආකාරයේ ඇප මෙහිදී නියම කළ හැකි වේ.

කෙසේවෙතත් 24(1) (ආ) වගන්තිය මගින් ඇප ලබාදීමේදී පැනවිය හැකි සුවිශේෂී කොන්දේසියක් පිළිබඳව ප්‍රතිපාදන සලසයි. ඒ අනුව යමකු ඇප පිට මුදා හැරිමේදී, අපරාධයක වින්දිතයා හෝ සාක්ෂිකරු සමග හෝ නියෝගයේ නිශ්චිතව සදහන් කරනු ලැබිය හැකි වෙනත් යම් තැනැත්තකු සමග සන්නිවේදනය කිරීම හෝ ඔවුන් සමීපයට පැමිණීම තහනම් කරමින් ඒ නියෝගයේ දී කොන්දේසියක් නියම කල හැක. මෙම කොන්දේසිය කඩ කිරීම ඇප අවලංගු කිරීම සදහා ඇප පනතේ 14 වගන්තිය යටතේ හේතුවක් විය හැක. 

පනතේ 24(3) වගන්තියට අනුව 24(1) වගන්තිය ‍යටතේ ඇප ලබාගන්නා තැනැත්තකු ඇප මත සිටින කාලය තුළ නැවතත් පනතේ 14-23 දක්වා වගන්ති වල දැක්වෙන වරදක් සිදුකර ඇති බවට නිගමනය කිරීම සදහා බැලු බැල්මට පෙනෙන කරුණු ඇති බවට, පරීක්ෂණයක් කිරීමෙන් පසුව අධිකරණයක් විසින් අනාවරණය කර ගනු ලැබුවේ නම්, ඇප ලබා දුන් අධිකරණය විසින් ඒ ඇප අවලංගු කර අධිකරණයට සාධාරණ යයි සලකනු ලැබිය හැකි යම් කාල සීමාවකට ඒ තැනැත්තා රක්ෂිත බන්ධනාගාර ගත කල යුතු වේ. 

මෙම වගන්තියට අනුව ඇපය අවලංගු කරන්නේ ඇප ලබා දුන් අධිකරණය විසින්මය. නමුත් ඇප පිට සිටින කාලය තුළ අදාල තැනැත්තා පනතේ iii කොටසේ දැක්වෙන වැරදි සිදුකර ඇතැයි අනාවරණය කර ගැනීම ඒ අධිකරණය නොවන වෙනත් අධිකරණයකට ද සිදු කල හැක. ඒ බව ‘අධිකරණයක් විසින් අනාවරණය කර ගනු ලැබුවේ නම්’ යන පාඨයෙන් අනුගම්‍ය වේ. මේ නිසා එවැනි විටකදී අදාල දෙවැනි වැරදි සම්බන්ධ කරුණු පිළිබඳව ඇප ලබාදුන් අධිකරණයට වාර්තා කිරීමට සිදු වේ. ඒ බවද සැලකිල්ලට ගත යුතුය. 

කෙසේවෙතත් ඇප සම්බන්ධයෙන් ඇප පනතේ විධාන ඇතුළත් වන නිසා මෙහි දැක්වෙන සාධාරණ කාලය යන්න ද ඇප පනතේ විධාන වලට යටත්ව ක්‍රියාත්මක වන බව සඳහන් කළ යුතු ය. 

වැදගත් - පනත යටතේ

- [x] ඇප දිය හැකි අධිකරණය - මහේස්ත්‍රාත් අධිකරණය

- [x] ඇප දීමේදී අදාල වන පනත - 1997 අංක 30 දරන ඇප පනත හා 2023 අංක 10 දරන පනත