තෑගි ඔප්පුවකින් ත්‍යාගය භාර ගැනීම - කල හැකි දිනය - බලපෑම

තෑගි ඔප්පුවකින් ත්‍යාගය භාර ගැනීම - කල හැකි දිනය - බලපෑම

දේපල අයිතිකර ගැනීමේ එක් ක්‍රමයක් ලෙස ලංකා නීතියේදී ත්‍යාග පිළිගනී. සමහර අවස්ථාවලදී ත්‍යාග ඔප්පු සැකසීමේදී එක්වර තෑගි දීමනාකරු හා තෑගි ලැබුම්කරු ඔප්පුවේ අත්සන් කර නොතිබීම මත අදාල ත්‍යාගය භාරගෙන නොමැත යන පදනමෙන් එය ප්‍රශ්න කරන අවස්ථාද දක්නට ලැබේ. ලංකා නීතියට අනුව මේ පිළිබඳ තත්ත්වය කෙටියෙන්  විමසීම මෙම ලිපියේ අරමුණයි. 

ත්‍යාග සම්බන්ධයෙන් වන විට ලංකාවේදි බලපාන්නේ රෝම ලන්දේසි නීතිය වේ (වෙල්ලප්පා එ.  මුදලිහාමි - 6 න.න.නී.වා 233). කෙසේවෙතත් නිශ්චල දේපලක් පැවරීමට අදාල වන කාර්ය පටිපාටිය සම්බන්ධව අදාල වන නීතිය ඇතුලත් වන්නේ වංචා වැලැක්වීමේ ආඥාපනතේ 2 වගන්තිය තුලය. එම වගන්තිය තුල ත්‍යාග යන්න ඇතුලත්ව නැත. මේ නිසා අයෙකුට එම වගන්තිය ත්‍යාගයක් සදහා අදාල නොවන බව කිව හැකි වුවත් ත්‍යාග ඔප්පුවද නිශ්චල දේපල පැවරීමක් වන හෙයින් සහ ඊට අදාළ ගිවිසුමක් වන හෙයින් 2 වගන්තියේ ප්‍රතිපාදන අදාල වන බව පෙනී යයි. 

එම වගන්තියට අනුව ලියා අත්සන් කරන්නන් විසින් නොතාරිස්වරයා හා සාක්ෂිකරුවන් දෙදෙනා ඉදිරියේ අත්සන් කිරීම, ඇඟිලි සලකුණ හෝ පතුල් ඇගිලි සලකුණු යෙදීම එක්ව සිටියදී එකවර සිදු කල යුතුය. මේ තත්ත්වය ත්‍යාග ඔප්පුවකට අදාලව පසු අවස්ථාවකදී සාකච්ඡා කරනු ලැබේ.  

වංචා වැලැක්වීමේ ආඥාපනත හෝ වෙනත් යම් නීතියක් මගින් ලංකාව තුලදී දේපල පැවරීමකදි ඔප්පුව ලියනු ලැබුවද, එම ඔප්පුව භාර දිය යුතු බවට වන ප්‍රතිපාදනයක් දක්වා නැත. ඊට හේතුව ඒ සම්බන්ධව රෝම ලන්දේසි නීතිය අදාල වීමයි. රෝම ලන්දේසි නීතියට අනුව නොතාරිස්වරයකු සහතික කරන ඔප්පුවක් භාරදීම, ඔප්පුව බලාත්මක කිරීම සඳහා අවශ්‍ය වන්නේ නැත. ත්‍යාග ඔප්පුවද නොතාරිස් සහතික කරන ඔප්පුවකි. ඒ අනුව එය භාර දීම රෝම ලන්දේසි නීතියට අනුව ඔප්පුවේ බලාත්මක භාවයට බලපාන්නේ නැත. මේ තත්ත්වය සමග සැලකිල්ලට ගත යුතු කරුණ වන්නේ ත්‍යාගයක් ඕනෑම අවස්ථාවක ත්‍යාග ලැබුම්කරුට භාර ගැනීමට හැකියාව ඇති බවට නඩු තීන්දු නීතියේදී තීරණය වී තිබීමයි (වික්‍රමසිංහ එ. විජේතුංග - 14 න.නී.වා 413). අනෙක් අතට ත්‍යාග ඔප්පුවක්, යම් අවස්ථාවක භාර නොගත හොත් එය අවලංගු වේ [(D.M. Gunadasa & Others v. D.M. Upul Kumarasiri Bandara (C.A. No. 37/95(F) decided on 22.06.2018)].

ඒ අනුව ත්‍යාග ලැබුම්කරුට රෝම ලන්දේසි නීතීයේදි පෙන්වා දී ඇති ආකාරවලින් එකකට, අදාල ත්‍යාගය භාරගත හැක. ඒ නිසා බාලවයස්කරුවකුට ලබා දෙන ත්‍යාගයක් ඒ බාලවයස්කරු වෙනුවෙන් බලය ඇති වෙනත් අයකුට ලබාගත හැකි අතර අවශ්‍ය නම් එම බාලවයස්කරු වයෝපූර්ණත්වයට පත් වූ විට ඔහුටම භාරගත හැකි බව වෙල්ලප්පා එ. මුදලිහාමි (6 න.නී.වා 233) නඩුවේදී පෙන්වා දී තිබේ. මේ සම්බන්ධයෙන් SC Appeal No. 127/2012, SC Minutes of 01.04.2021 නඩු තීන්දුවද බලන්න. මේ නිසා අද පවතින නීති තත්ත්වය අනුව ද ත්‍යාග ඔප්පුවක්, ත්‍යාග ලැබුම්කරු විසින් එය ත්‍යාග දීමනාකරු ලියා අත්සන් කරන අවස්ථාවේදී භාර නොගත්ත ද පසු අවස්ථාවකදි භාර ගැනීමට හැකියාව පවතින බව පෙනී යයි. 

(ත්‍යාගය භාර ගැනීම සිද්ධිමය කරුණු මත රැඳී පවතින බව පෙර කී SC Appeal No. 127/2012, SC Minutes of 01.04.2021 නඩු තීන්දුවේදී අමරසේකර විනිසුරුතුමා  විසින් පෙන්වා දී ඇත) 

මේ හේතුව මත එකම අවස්ථාවේ එක්වර ත්‍යාග දීමනාකරු සහා ත්‍යාග ලැබුම්කරු තෑගි ඔප්පුවේ අත්සන් කර නොතිබීම මත අදාල ත්‍යාගය භාර ගෙන නොමැත යන පදනමින් ප්‍රශ්න කිරීම ලංකා නීතියට අනුව වලංගු නොවන බවත් එය ඒ ඒ අවස්ථාව මත රැඳී පවතින්නක් වන බවත් කිව හැක.